ဘလော့လေးနဲ့ ဝေးနေတာ တော်တော်တောင် ကြာခဲ့ပြီ။ ပီမိုင်နားနီး (ပီ = နှစ်၊ မိုင် = အသစ်၊ ပီမိုင် = နှစ်သစ်။) နန်းတို့တွေက နှစ်ကုန်ခါနီး လို့ပြောပေမဲ့ သူတို့တွေက နှစ်သစ်ကူးခါနီးလို့ပြောကြတယ်။) စက်ရုံမှာအလုပ်တွေတအားအရေးကြီးနေတော့ production ပိုင်းမှာ သွားကူနေရတယ်။ နန်းတို့ office ပိုင်းကသူတွေတော်တော်များများ သွားကူကြရတယ်။ နန်းတို့ ဌာနက အလုပ်ပါးတဲ့ဌာနဆိုတော့ တစ်ပါတ်မှာ တနင်္လာ တစ်ရက်ပဲ ကိုယ့်အလုပ်စားပွဲကိုယ် ပြန်လာပြီး တစ်ပါတ်လုံးစာ အလုပ်တွေ သိမ်းကြုံးလုပ် ..... ကျန်တဲ့ရက်တွေ သူများဌာနတွေမှာ သွားကူ .... အဲ့လိုဆိုတော့ ဘလော့လေးဆီ မရောက်နိုင်တာလဲ မပြောတော့နဲ့။ အဲ့လို သွားကူတော့မှ အလုပ်တွေကို ခက်ခက်ခဲခဲ ပင်ပင်ပမ်းပမ်း လုပ်နေရတာတွေကို နဖူးတွေ့ ဒူးတွေ့ တွေ့တော့တယ်။ ကိုယ့်နေရာမှာ ကွန်ပျူတာလေးနဲ့ ချောက်ချက်ချောက်ချက် လုပ်နေရာကို နန်းမှာ ပင်ပမ်းလှပြီထင်နေတာ သူတို့လုပ်နေရတာနဲ့ ဘာရေးချ ဘာမှမဆိုင်ဘူး။ နန်းတို့စက်ရုံက ဖန်စီပစ္စည်းတွေ ထုတ်တယ်။ ဖန်စီဆိုတာကို လက်စွပ်၊ ဆွဲကြိုး၊ နားကပ်၊ ဟန်းချိန်း၊ ဖုချိန်း လောက်သာသိပေမဲ့ ဒီမှာထုတ်တဲ့ပစ္စည်းတွေကတော့ စုံမှစုံပဲ နားရွက်တစ်ဖက်ထဲမှာတင် ဆယ်မျိုး ဆယ့်ငါးမျိုးမက ရှိတယ်။ ခန္ဓာကိုယ် တစ်ကိုယ်လုံးမှာလဲ ဝတ်လို့မရတဲ့ နေရာ တစ်နေရာမှ မရှိဘူး။ နေရာတိုင်းမှာ ဝတ်လို့ရတယ်(မတော်တရော်တွေမှာလဲ ဝတ်ကြတယ်။)။ နန်းတို့က လွယ်လွယ်ကူကူ ဖန်စီလို့ခေါ်ပေမဲ့ သူတို့ကတော့ Body piercing တဲ့။ စတီးပစ္စည်းလေးတွေ ဝင်းလက် တောက်ပြောင်နေအောင် ကော်ပတ်စား အရောင်တင်ရတဲ့ဌာနက လူတွေဆို သူတို့လက်ချောင်းလေးတွေ လက်သည်း ထိပ်တွေ ကော်ပတ်စား၊ ကျောက်စက်တိုက်တဲ့ ထဲ ပါကုန်တယ်တဲ့။ မော်တာနဲ့ လည်နေတဲ့ ကျောက်စက်နဲ့ အရောင်တင်ချင်တဲ့ ပစ္စည်းတွေနဲ့ သွားကပ်ပြီး တိုက်စားပစ်ရတာဆိုတော့ စက်လည်တဲ့အရှိန်နဲ့ တိုက်စားတဲ့အရှိန်နဲ့ အဲ့ဒီအရောင်တင်ခံရတဲ့ပစ္စည်းက ပူကျက်နေတယ်။ မတော်တဆ လက်ကနေ ချော်ထွက်ပြီး အသားနဲ့ ထိမိရင် အပူလောင်သွားရော သူတို့ လက်တွေ (လက်ဖမိုး၊ လက်ကောက်ဝတ်၊ လက်ဖျံတွေ) ဆိုရင် အမာရွတ်မရှိတဲ့သူ မရှိဘူး။ သူတို့ လက်သည်းထိပ်လေးတွေဆို စောင်းတဲ့သူကစောင်းနေကြတယ်။ နန်းဆို နန်းရဲ့ လက်သည်းတွေ လက်တွေ ထိခိုက်မှာ တအားကြောက်တယ်။ နန်းသာ အဲ့လိုနေရာမှာ အလုပ်လုပ်ရရင် ချက်ချင်း ထွက်ပြေးမှာပဲလို့ ပြောမိတော့ နန်းကို မရင့်ကျက်သေးတဲ့ ကလေးတစ်ယောက်ကို ကြည့်တဲ့မျက်လုံးမျိုးနဲ့ ကြည့်နေကြတယ်။ မနန်းမှာက ရွေးစရာရှိတာကိုး လို့လဲ ပြောကြတယ်။ အဲ့လိုဆိုတော့လဲ စိတ်မကောင်းဘူး။ တစ်နေ့ သုံးရာရတာချင်းအတူတူ မနန်းအလုပ်ကျတော့ သက်သာလိုက်တာတဲ့။ နန်းအလုပ်က လူသက်သာပေမဲ့ စိတ်ပင်ပမ်းတယ်။ ဒီကိုရောက်တဲ့ သုံးနှစ်အတွင်း မနန်းရုပ်ကြီး အိုစာသွားတာ စိတ်ပင်ပမ်းလွန်းလို့ပေါ့။ ညီမတို့တော့ လာတုန်းကထက်တောင် ပိုဖြူ ပိုနု ပိုလှလာသေးတယ်မဟုတ်ဘူးလား လို့ ပြန်ပြောမိတယ်။ ဖြေရှင်းချက်ပေးတာလား။ သူတို့ကို အားပေးစကားပြောတာလားတော့ နန်းစိတ်ထဲလဲ မသေချာပါဘူး။
ကဲ ... ဒီအကြောင်းတွေ ခဏရပ် မနက်ဖြန် ဒီဇင်ဘာ ၂၂ ဆိုရင် မွေးသဖခင် ကျေးဇူးရှင် ချစ်ဒက်ဒီရဲ့ မွေးနေ့ ရောက်ပြီ။ နန်းတို့မိသားစုမှာ မာမီနဲ့ မောင်လေးက ဖေဖော်ဝါရီလမှာမွေးတယ်။ ညီမလေး နှစ်ယောက်က ဧပြီလ။ နန်းနဲ့ ဒက်ဒီကတော့ တစ်ဘာသာစီ ဒက်ဒီက ဆောင်းအေးအေး ဒီဇင်ဘာမှာမွေးပြီး နန်းက နွေခေါင်ခေါင် မေလမှာ မွေးတယ်။ ဒါကြောင့်များ နန်းနဲ့ ဒက်ဒီနဲ့ အဆင်မပြေတာလားမသိ။ သားအဖနှစ်ယောက်က အဆင်သာ မပြေကြတာ မောင်နှမတွေထဲမှာ နန်းက ဒက်ဒီနဲ့အတူဆုံးပဲ အရပ်အမောင်းကတော့ နန်းတို့မောင်နှမတွေ အားလုံး ဒက်ဒီနဲ့တူပါတယ်။ အသားအရေကတော့ မောင်နှမတွေထဲမှာ နန်းက အဖြူဆုံးပဲ။ ဒက်ဒီတို့က ရှမ်းဆိုတော့ ရှမ်းသွေးတွေ အပြည့်အဝရပြီး နန်းက အသားဖြူတယ်။ ခြေဆံလက်ဆံတွေလည်း ဒက်ဒီနဲ့တူလို့ ရှည်ရှည်ကြီးကြီးတွေပေါ့။ ဂျိုင်းချွေးနံ့နံတာကအစ မောင်နှမတွေထဲမှာ နန်းတစ်ယောက်ပဲ ထူးခြားပြီး ဂျိုင်းချွေးနံ့ နံတယ်။ ဒက်ဒီလဲနံတယ်။ အကျင့်တွေလဲ တူကြတယ်။ ခေါင်းမာတာ မှန်တယ်ထင်ရင် နောက်မဆုတ်တဲ့တာ။ ဇွဲကြီးတာ။ နန်းကတော့ “သူဌေးဖြစ် ခွေးဖြစ်ကြံတာ” လို့ ပြောတယ်။ (ကဗျာမဆန်လိုက်တာနော်...)သားအဖနှစ်ယောက်လုံးက သေမြေကြီး ရှင်ရွှေထီးဆိုတဲ့ အဖြစ်မျိုးရောက်အောင် အမြဲလုပ်တတ်ကြတယ်။ ဒါပေမဲ့ ... ဒါပေမဲ့ပေါ့လေ .... နန်းတို့သားအဖနှစ်ယောက် မျက်နှာချင်းဆိုင်လို့မရဘူး။ အိမ်ပြန်သွားလို့ သားအဖတတွေမတွေ့တာကြာလို့ စကားထိုင်ပြောကြ အဆင်ပြေကြတာတွေဟာ နှစ်ရက်တစ်ပိုင်းမခံဘူး။ ပြဿနာဖြစ်ကြပြန်တယ်။ ပြဿနာ ဖြစ်တယ်ဆိုတာ အော်ကြီးဟစ်ကျယ် ရန်ဖြစ်ကြတာကို ပြောတာမဟုတ်ပါဘူး။ စကားဆက်ပြောလို့ အဆင်မပြေတော့ဘူး။ အမြင်တွေမတူတော့ဘူးလို့ပြောတာ။ ဒက်ဒီကလဲ သူမှန်တယ်ထင်တဲ့ဘက်က ဇွတ်ငြင်း။ နန်းကလဲ နန်းမှန်တယ်ထင်တဲ့ဘက်က လုံးဝ အရှော့မပေးဘူး။ (နန်းလွန်တာပေါ့နော်...း)) ဘာပဲဖြစ်ဖြစ်ပါ ... မနက်ဖြန်မှာ ကျရောက်မယ့် ချစ်ဒက်ဒီရဲ့ ရွှေရတုလွန်(နောက်နှစ်ဆို ၆၀ ဖြစ်ပြီ) မွေးနေ့မှသည် နောင်မှတ်တိုင်ပေါင်းများစွာ သားသမီး မြေးမြစ်များနဲ့ ပျော်ရွှင်အေးချမ်းစွာ ဖြတ်သန်း နိုင်ပါစေလို့ ချစ်သမီးကြီး အဝေးတစ်နေရာကနေ ဆန္ဒပြုပါတယ်...။
No comments:
Post a Comment