ရှင်မင်းလေး ရေနွေးစိမ်လိုက်တဲ့ ဖုန်းလေးက ကောင်းနေသေးတယ်ဆိုပြီး ဒီနေ့ အလုပ်ထဲကို ကောက်ယူလာခဲ့မိတယ်။ ဘာစိတ်ကူးပေါက်တယ်မသိ။ အခါတိုင်း အလုပ်ထဲကို ဖုန်းယူမလာတတ်ပါဘူး။ စိတ်ကူးပေါက်မှယူလာတာ။ အလုပ်သမားတွေဆို ဖုန်းကိုင်ခွင့်မရှိတော့ ကိုယ်က ဖုန်းတကားကားနဲ့လုပ်နေရမှာ အားနာလို့ပါ။
ဒီနေ့ဖုန်းယူလာခဲ့မိတာ ကံကောင်းတယ်လို့ပြောရမလား၊ အလုပ်ထဲက မြန်မာ ကောင်မလေးတစ်ယောက်ရဲ့ အဖေဆုံးသွားလို့တဲ့ သူ့အမျိုးသားလေး ဖုန်းဆက် လာတယ်။ “ဟလို...အမ မနန်းလား။ ကျွန်တော်မအိယောက်ျားပါ။ စက်ခန်းထဲက မအိလေ။ သူ့အဖေ ဆုံးသွားလို့ ဖြစ်နိုင်ရင် သွားပြောပေးပါလားမနန်းရယ်။” “အေးအေး အမ ခုချက်ချင်းပဲသွားပြောပေးမယ်နော်။ ခုချက်ချင်းပြန်လို့ရရင်လဲ ပြန်လို့ရအောင်ပြောပေးမယ်။ မရရင်လဲ နေ့လည်ထမင်းစားချိန်ပြန်လို့ရအောင် ပြောပေးမယ်နော်။” ဆိုပြီး ချက်ချင်းပဲ office ကိုအကြောင်းကြား မြန်မာပြည်ပြန်ဖို့တွေဘာတွေ စီစဉ်ပေးလိုက်နိုင်တယ်။
သူ့အမျိုးသားလေးကို “ခုပြန်လို့ရပြီ စက်ရုံရှေ့မှာ လာကြိုပေးလိုက်နော်... နေအရမ်းပူနေတယ်ဆိုတော့လေ...။ တော်ကြာမူးလဲမှာစိုးလို့နော်...။” “ဟုတ်ကဲ့အမ ကျွန်တော်လာကြိုလိုက်ပါမယ်” စာရွက်စာတန်းတွေလုပ်စရာရှိတာလုပ်ပေးပြီး စက်ရုံရှေ့ကိုလိုက်ပို့ပေးလိုက်တယ်။
နန်းတော့လိုက်မပို့လိုက်ပါဘူး စည်းကမ်းကြီးတဲ့စက်ရုံဆိုတော့ ဝန်ထမ်းရေးရာကိုင်တဲ့ အမကြီးတစ်ယောက်လိုက်ပို့ပေးလိုက်တယ်။ နန်းက ရပ်ကြည့်နေရုံပေါ့။ နန်းသာဖုန်းယူမလာရင် ခမျာ ညနေအလုပ်ဆင်းမှ သိရရှာမှာ။ သူ့အမျိုးသားလေးက သမီးပါပါးတို့နဲ့ အလုပ်ရုံအတူတူပဲဆိုတော့ နန်းဆီအကြောင်းကြားလို့ အဆင်ပြေတာပေါ့။
ကျန်တဲ့အလုပ်သမားတွေရော အလုပ်ထဲကို ဖုန်းယူခွင့်မရှိတာနဲ့ အဲ့လိုအကြောင်းအရာတွေကို ဘယ်လိုလုပ်အချိန်မှီသိနိုင်ပါ့မလဲနော်။ နန်းကိုယ်တိုင်ရော မြန်မာပြည်မှာ ဖွားဖွားက အသက်ကိုးဆယ်ကျော်ပြီ။ မြေးဦးဆိုတော့ ခုထိစိတ်ပူပြီးမှာနေတုန်း။
ဘန်ကောက်ကိုဆေးလာကုတဲ့ဒက်ဒီ့အမကို နန်းတို့ဆီ ရောက်အောင်သွားပြီး နန်းတို့ဘယ်လိုနေကြလဲ၊ ဘယ်လိုအလုပ်လုပ်ကြလဲ၊ အဆင်ပြေကြလားလို့ ဓါတ်ပုံရိုက်ပြီး ယူလာပါလို့မှာတယ်တဲ့။ ပါးစပ်ကပဲပြောရင်တောင် မယုံလို့ ဓါတ်ပုံပါရိုက်ခဲ့ခိုင်းသေးတယ်။ သေချာအောင်လို့။
မသာတစ်ခေါက်ကျောင်းဆယ်ခေါက်ဆိုတာ ဒါမျိုးပဲဖြစ်မယ်။ ကိုယ့်အလှည့်ကျရင်ရော ရင်ဆိုင်ဖို့အဆင်သင့်ဖြစ်ပြီလား...။ ခုတော့ တုန်လှုပ်နေတုန်းပဲ။ အဆင်သင့်မဖြစ်သေးတာသေချာတယ်။ ပြင်ဆင်ရအုံးမယ့်အရာတွေ့အများကြီးပဲ။ ကြိုတင်လေ့ကျင့်မှုတွေလုပ်ရမယ်လေ။
အရှင်ဆန္ဒာဓိက စာအုပ်ထဲကလို ကိုယ်တိုင်အစမ်းသေကြည့်ဖို့မပြောနဲ့ ကိုယ့်ဖွားဖွား လို့တွေးမိရင်တောင် တုန်လှုပ်နေတုံးပဲ...။ မိဘတွေဆိုရင်ရော...၊ မောင်နှမတွေဆိုရင်ရော...၊ ကိုယ်ကိုယ်တိုင်ဆိုရင်ရော...၊ သားသမီးတွေဆိုရင်ရော...။
သေချာတယ်။ ငါသည်မုချသေရမည်...။ အချိန်ပိုင်းသာလိုတော့သည်...။ အသေမဦးခင် ဉာဏ်ဦးမှတော်တော့မည်...။ ဉာဏ်ဦးအောင် ဝိပဿနာတရားအားထုတ်ရမည်...။ ကောင်းမှုမှန်သမျှ လုပ်ဖြစ်အောင်လုပ်ရမည်...။ ဖြစ်သမျှအကြောင်း မကောင်းကောင်းအောင်လုပ်...။
No comments:
Post a Comment